Achithiwe ‘amakinati’ abekwe yiSundowns ifuna owaseTanzania
– Intatheli yeLisenethini
Uma iMamelodi Sundowns izimisele ngampela ngokuthola uFeisal Fei Toto Salum, kuzomele ihlukane nemali ebhekile.
Izingxoxo zeMamelodi Sundowns ne-Azam FC yasetanzania zibe nengwijikhwebu ngodaba ebingalindelekile muva nje.
Lezi zinkunzi zaseNingizimu Afrika bezifuan ukudayiselwa lo mdlali, zabeka nemali etafuleni kodwa i-Azam FC yathi yona izomdedela ngo-$2-million, olingana no-R36 million ngemali yakuleli.
USalum, owaziwa ngokuba nekhono elikhethekile, ube ngumdlali ovelele kwi-Azam FC, wadonsa amehlo emaqenjini amaningi aphezulu.
IMamelodi Sundowns, ihlose ukuqinisa isikwati sayo ngaphambi kwesizini ezayo, kanti ibona uSalum engumdlali ongaba wusizo kuyo.
Nokho, leli qembu laseTanzania aligculisekile ngesicelo samanje seSundowns, likholelwa ukuthi inani likaSalum ligunyaza u-$2-million ophelele.
Abaphathi be-Azam FC basamile kulelo, bagcizelela ukuthi ngeke bahlukane nalo mdlali oneminyaka engu-25 nganoma yini engaphansi kwentengo abayibekile.
Ukungaboni ngaso linye kushiya iSundowns nesinqumo okufanele yenze: ukuhlangabezana nenani le-Azam noma ikhohlwe yilo mdlali.
BUKA: UNjabulo Blom ushaye elihle igoli behlulwa
Njengoba iwindi lokuhwebelana ngabadlali lisavuliwe nje, amehlo azobe ethe njo ezingxoxweni, abalandeli balindele ngabomvu ukubona ukuthi iSundowns izomthola yini lo mdlali.
