Ziyabuya kuMaZulu, abanye bayangena, abanye bayaphuma

– Intatheli yeLisenethini

Umdlali wasemuva weMamelodi Sundowns, uSifiso Ngobeni, usezohlolwa kuMaZulu ngaphambi kokuphothula ukufudukela kwakhe ngokugcwele kuleli qembu laseThekwini. 

Leli nxele liye kuMaZulu ezinyangeni eziyisithupha ezedlule lifuna ithuba lokudlala njalo ngaphansi komqeqeshi uPablo Martin. 

Ngokubika kweSABC Sport, uNgobeni uzohlolwa KwaZulu-Natal ngaphambi kokuthi kuphothulwe isivumelwano sokumsayina ngokugcwele ngaphambi kwesizini ka-2024/25.

UNgobeni uqale wajoyina iSundowns esuka kwiBloemfontein Celtic engasekho ngesikhathi leli qembu lidayiselwa iRoyal AM ngo-2021. 

Wabe esebolekwa yizimbangi zeSundowns zasePitori, iSuperSport United ngaphambi kokubuyela kuyo. 

Udlale kuyona imidlalo embalwa ngaphansi komqeqeshi uRulani Mokwena. 

NgoJanuwari, lo mdlali, ona-27, wavuma ukujoyina Usuthu, lapho efike wahlaba khona umxhwele.

Lokhi kuholele ekutheni athole inkontileka yesikhathi eside naleli qembu elizinze eThekwini. 

Njengoba uNgobeni ebengadlali njalo – udlale imidlalo emine kuphela esiwombeni sesibili sesizini – isinqumo sokumthatha unomphela siyamangaza.

Khonamanjalo, iSABC Sport ibika ukuthi uThembela Sikhakhane kulindeleke ukuthi awashiye AmaZulu.

Usejoyine uhlu lwabadlali abangasadingeki kuleli kuMaZulu okukhona kubo oVeluyeke Zulu, uGeorge Maluleka no-Augustine Kwem. 

OLUNYE UDABA: IKaizer Chiefs ‘ipheka’ buthule, kusho isikhulu

Usuthu luqinisekise ngoLwesihlanu ntambama ukuthi umgadli uVictor Letsoalo naye uzohamba ngemuva kweminyaka emibili eseThekwini.