IMilford isiqashe ozakhele igama kwiPirates
– ZInhle Ngubane
Iqembu laKwaZulu-Natal elidlala kwiMotsepe Foundation Championship, iMilford FC, selinomqeqesi omusha ozakhele igama kwi-Orlando Pirates.
IMilford beyiqeqeshwa ngusihlalo uXhanti Pupuma onomsebenzi awenzayo ngokuphelele wobuDokotela.
ILisenethini isingakuveza ukuthi uPupuma uzoshenxa ekuqeesheni njengoba eseqashe uMandla Qhogi njengomqeqeshi omusha waleli qembu laseMhlathuze.
UQhogi ubengumqeqeshi weqembu lenkulisa le-Orlando Pirates elidlala kwiDStv Diski Challenge iminyaka eminingi.
Ukhishwe ngoba sekungena inkakha yeqembu, uJoseph Makhanya kuleli qembu leBucs.
Usuke kwiPirates waya kwiSikhukhune United nakhona eyosebenza enkulisa yakhona njengoba esethathwe iMilford nje manje.
Ngokuthola kweLisenethini lo mqeqeshi uzomenyezelwa ngokusemthethweni ekuqaleni kukaJulayi.
Leli qembu like lacishe lazithola lisempinii yokuvika izembe ngesizini edlule kodwa lagcina likwazile ukuzihlenga kuleso simo.
UPupuma uke waxoxa neLisenethini muva nje esho ukuthi kuningi abakufundile kule sizini obekungeyokuqala kubo esigabeni esikhokhelayo.
Lesi sikhulu sazibambela ekuqeqesheni kulandela ukuxosha u-Asanda Mvala obesesebenze kuleli qembu isikhathi eside.
Leli qembu langena kulesi sigaba ngokuthi lithenge isitifiketi soThongathi FC.
OLUNYE UDABA: Selivelile iqembu azosayina kulo u-Andile Jali
Lizakhele igama ngokuwashisa iKaizer Chiefs ijezi, liyibhulisa amazolo kwiNedbank Cup kuyo le sizini.
