Sekuneqembu elibeka amabili amathathu kuKeagan Dolly
– Sibongiseni Gumbi
Sekuneqembu elidlala esigabeni esiphezulu sePremier Soccer League (PSL) eselivule izandla, lathi lingamemukela uKeagan Dolly uma evuma.
UKeagan Dolly uphelelwe yindawo kwiKaizer Chiefs abesehlale kuyo iminyaka emithathu njengoba etshelwe kuleli sonto ukuthi akasadingeki.
Leli qembu libizele uKeagan Dolly nozakwabo ababili – oSiyethemba Sithebe noSifiso Hlanti – ehhovisi labazisa ukuthi ucu alusahlangani.
Yingakho ke manje lo mdlali oneminyaka engu-31 futhi owazakhela igama kwiMamelodi Sundowns neBafana Bafana esefuna ikhaya elisha.
I-iDiski Times ibika ukuthi uDolly usesheshe wasithola isesheli esisha njengoba iSuperSport United isha amashushu ngaye.
Leli qembu elicijwa uGavin Hunt lizama ukuzakha kabusha ukuze lizokwazi ukuphinde lilwele izindebe njengakudala.
Seyiqala ukuba miningana impela iminyaka Amatsatsantsa a Pitori agcina ukufaka indebe ekhabetheni lawo.
Ngamava anawo, uDolly engaba wusizo olukhulu kuleli qembu elakhiwe ngabadlali abasebancane.
Nokho kungenzeka uKeagan Dolly agcine engaphelelanga kuleli ngenxa yemali kwazise kudume ukuthi ubeyikha ngamafosholo kwiChiefs.
OLUNYE UDABA: Ezintsha ngokudayiswa kweMoroka Swallows
ISuperSport kusanda kuvela ukuthi akuyihambeli kahle emalini nokuyingakho ihlezi idayisa abadlali bayo abangconywana isizini nesizini.
