Isisayine omunye unozinti osemncane iPirates
– Intatheli yeLisenethini
I-Orlando Pirates isisayinise unozinti u-Ethan Khel obegijima eqenjini elidlala kwi-ABC Motsepe League, iNorthern Cape Pros FC.
Unozinti lona ube ngomunye wabadlali abavelelile ngesikhathi kudlalwa imidlalo yokuhlunga ye-ABC Motsepe League yakamuva.
Yize iPirates ingakasho lutho ngalezi zindaba, iNC Pros yona seyikumemezelile ukuthi seyiyidayisele lo nozinti wayo.
“Egameni le-NC Pros FC, ngifuna ukuhalalisela u-Ethan Khel ngokusayina inkontileka ne-Orlando Pirates,” besifundeka kanje isitatimende saleli qembu.
“Makabongwe uNkulunkulu ngokukunika leli thuba empilweni njengoba kuyiphupho lanoma yimuphi umdlali ukusayina kwenye yamakilabhu amakhulu eNingizimu Afrika.
“Njengoba ngangishilo. Wena hlala uzimisele, uziphathe kahle futhi uziqeqeshe kanzima…
“Uzokuzuza okufisayo. Kujabulele ukuya kwiPirates futhi ube yisibonelo konozinti abasebancane baseNorthern Cape,” kuqhuba isitatimende.
IPirates ithungatha onozinti nje isanda kudedela amabili abanamava oRichard Ofori noSiyabonga Mpontshane.
Isanda kuphulela omunye unozinti osemncane uSiyabonga Dladla obeseqenjini layo elidlala kwi-ABC Motsepe League eGauteng, iPele Pele FC.
Ibuyise noSiphamandla Gumede ebimthenge kwiDondol Stars yabe seyimbolekisa kwi-Orbit College edlala kwiMotsepe Foundation Championship.
Kuvela ukuthi labo nozinti bazozicija neqembu elikhulu njengoba kulungiselelwa isizini ngaphambi kokuthi kuthathwe isinqumo ngokuthi yimuphi kubo ohlala eqenjini elikhulu.
Uma abaqeqeshi bebona ukuthi basadinga ukukhuliswa, bazobolekiswa kwamanye amaqembu ezigabeni ze-PSL ukuze bathole ukudlala.
Laba bafana abasebancane bajoyina oSipho Chaine noMelusi Buthelezi abenza into yamehlo ezintini zeBucs kulamasizini amabili edlule.
UChaine uyena isethenjwa kanti uButhelezi naye akaphoxi uma engekho uChaine.
IPirates isamataniswa nanoStanley Nwabali weChippa United futhi umqeqeshi wayo uThabo September useke wakuveza ukuthi bayazi kungenzeka bangabi naye lo nozinti ngesizini ezayo.
Ekhuluma neLisenethini kuleli sonto, unozinti wakudala weBucs, uThabang Stemmer weluleke leli qembu ngokuthi limthathe uNwabali.
OLUNYE UDABA: IGallants iqinisekisa eyokuthenga iSwallows
Uthe amava akhe okudlala eqenjini lesizwe leNigeria kuzolisiza kakhulu kwiCaf Champions League.
