Ezintsha ngokudayiswa kweMoroka Swallows
– Intatheli yeLisenethini
Kuvela ukuthi sekuphelile ngampela ngeMoroka Swallows njengoba iPremier Soccer League seyikugunyazile ukudayiswa kwesitifiketi sayo sokudlala esigabeni esiphezulu sebhola elikhokhelayo.
IMoroka Swallows ifakwe endalini ngenxa yokuthi usihlalo wayo, uDavid Mogashoa, ubesephelelwe yimali yokugcina izindleko zeqembu.
Manje iFAR Post seyibika ukuthi iPSL seyigcine ikuvumile ukudayiswa kwayo, kanti idayiselwe u-Aram Sello weMarumo Gallants.
Lo mbiko uthi uSello ubeke imali engaphezulu kwebibhekwe yiMoroka Swallows okungu-R40 million.
Nokho okwamanje bekungakacaci ukuthi uSello uzolishintsha yini igama leqembu noma uzoqhubeka nayo iSwallows.
Nokuthi ngabe uzolisusa yini eGauteng alise kwesinye isifundazwe bekungakaziwa okwamanje.
Kunamahlebezi okuthi uSello uzoyisa eBloemfontein, asebenzise negama elifaka phakathi iCeltic.
OLUNYE UDABA: UFadlu Davids ufunwa yizinkunzi zase-Afrika
Kuthiwa lokhu uzokwenzela ukuvuselela uthando lwebhola lwabalandeli beBloemfontein Celtic.
