U-Itu Khune uphushelwa ekuwagaxeni emgibeni amagilavu

– Intatheli yeLisenethini

Abaphathi beKaizer Chiefs basolwa ngokuphoqa unozinti, u-Itumeleng Khune ekutheni awagaxe emgibeni amagilavu yena engakathandi. 

Kuvela ukuthi abaphathi bathi u-Itumeleng Khune akamemezele ezinkundleni zakhe zokuxhhumana ukuthi useyaliyela ibhola. 

Lezi zindaba zihletshelwe iLisenethini ngomunye wabasondelene nabadlali baleli qembu. 

Uthi u-Itumeleng Khune akeneme neze ngalokhu, kodwa abaphathi bayamphoqelela ukuthi akwenze. 

Kuzokhumbuleka ukuthi iChiefs ihloniphe uKhune ngokuthi imenzelwe ‘itiyana’ lokumbonga ngokuqeda iminyaka engu-25 ekuleli qembu. 

“Manje sebembambe ngobhongwane, bathi akamemezele, azise abalandeli ukuthi usethi khumu ekudlaleni,” kusho lo mthombo ocele ukungadalulwa nangengozi.

Uthe wesabela ukuthi uma kuvela igama lakhe, kuzolimala ubungani bakhe nabadlali okuyibona abamhlebele lezi zindaba. 

“Yena akayizwa ke leyo uma ngizwa. Kuthiwa uthenjiswa ukuthi kukhona umsebenzi abazomnika wona.

“Ngathi kukhulunywa izindaba zokuthi usengubuso beqembu ngakho ngisola ukuthi bazomfaka ophikweni lokudayiswa kweqembu.

“Kuthiwa abaphathi bayasaba ukuthi kube yibo abamemezela ukuthi uKhune uyaliyeka ibhola ngoba abalandeli bengase bengakusaseli lokhu. 

“Kodwa uma kuzisholo yena, abalandeli bazokwamukela lokhu futhi bamvalelise ngendlela efanele,” kuqhuba lo mthombo. 

Uqhube wathi uKhune uzibona esangadlala okungenani amasizini amathathu aze afike ku-41 weminyaka. 

Uthe yize engakezwa lutho, kodwa kungenzeka ukuthi akhona amaqembu amshelayo lonozinti owayegila izimanga naseqenjini lesizwe.

“Okwenza angabi nesasasa lokuyeka ukudlala wukuthi ubezitshela ukuthi uzongena ekucijeni onozinti.

OLUNYE UDABA: Okuhle nokubi ngo-Gilberto okhonjwa kwiPirates

“Kodwa manje umqeqeshi omusha ngathi uza nabakhe abaqeqeshi bonozinti, omunye uzosebenza ankulisa, omunye eqenjini elikhulu.”