Ezintsha

Sekuseduze iPirates ithole unyazi lwase-Angola

I-Orlando Pirates kubikwa ukuthi isifake isicelo sokudayiselwa lo mdlali ngemali elinganiselwa ku-R10 million. 

Yize inkontileka kaGilberto nePetro izoze iphele ngoJuni 2025, kuthiwa uzimisele ngokufudukela eNingizimu Afrika ukuze ajoyine iBhakabhaka.

Lo mgadli oneminyaka engu-23 ukwazi ukudlala kuzo zombili izinhlangothi esiswini, aphinde abe ngumgadli.

Udlale imidlalo engu-24 kwiPetro ngesizini edlule, washaya amagoli amahlanu, wakhela ozakwabo amagoli amahlandla amane. 

I-Orlando Pirates, ezibekisele indawo kwiCaf Champions League ngokuqeda endaweni yesibili kwiDStv Premiership, iphezu kwezinhlelo zokwakha kabusha iqembu layo ngemuva kokudedela abadlali abayisithupha.

Ekuqaleni kwenyanga, i-Orlando Pirates imemezele ukushiya kukaKermit Erasmus, uRichard Ofori, uSiyabonga Mpontshane, uThabang Monare, uSouaibou Marou, noFortune Makaringe. 

Njengoba kuphume abadlali abaningi, kulindeleke ukuthi kusayinwe abanye abasha ngaphambi kokuthi kuqale isizini ka-2024/25.

Kwezinye izindaba ezihlobene naleli qembu, lethule uhlelo lwalo lokulungiselela isizini ezayo. 

Iqembu lizoqala uhambo lwemidlalo emithathu eSpain njengengxenye yamalungiselelo alo.

Iqembu likaJose Riveiro lizoqala umkhankaso walo wangaphambi kwesizini libhekene neqembu le-English Championship, iPlymouth Argyle ngoJulayi 12. 

Lizobe selibhekana neqembu leLa Liga iSevilla eSpain ngoJulayi 15.

Liyibe selivala uhambo lwalo ngomdlalo elizobhekana kuwo ne-Al Sadd SC yaseQatar ngoJulayi 19.

Ngemuva kwalokho liyobe selibuyela ekhaya selizoqedela ukulungiselela isizini okulindeleke iqale ekuqaleni kuka-Agasti. 

Lukhulu ke elibhekwe kuleli qembu likaRiveiro ngesizini ezayo njengoba kulawa amabili edlule likhombise ukukhula.