Ezintsha

ULyle Foster ufunwa yizinkunzi zase-Italy

ULyle Foster, owake wadlalela iMonaco akakwazanga ukusiza iBurnley ukuthi ihlale kwi-English Premier League njengoba idliwe yizembe neSheffield United neLuton Town.

Izinkinga zempilo zimlahlekisele indawo eqenjini leBafana Bafana ebeliye kwi-Africa Cup of Nations (Afcon) e-Ivory Coast ngo-2023.

Kodwa usebuyele ngokuphelele eqenjini lika-Hugo Broos njengoba ebebiziwe ekhempini yakamuva yemidlalo yokuhlungela iNdebe yoMhlaba ka-2026.

Ngokombiko weSoccer Laduma, sekunentshisekelo emaqenjini ase-England yokuthi uFoster ahlale kwiPremier League.

IBurnley yona isizodlala kwiChampionship. Akuwona ke wodwa amaqembu ase-England anentshisekelo ngalo mgadli weBafana Bafana 

Ompetha beSerie A yase-Italy, basemakethe njengoba befuna umgadli omusha ozovala isikhala sikaMarko Arnautovic. 

ULyle Foster, okhiqizwe yinkulisa ye-Orlando Pirates, ungomunye wabadlali abasebancane okubonakala benekusasa elihle ebholeni. 

Useke wadlala naseBelgium la abonwa khona uVincent Kompany obecija iBurnley, wabe esemlanda. 

Namanje njengoba uKompany esekwiBayern Munich, kungenzeka amlande lo mgadli kwazise uyakholelwa kuye.