OweBaroka ucasha ngesithupha ngekusasa likaMammila

– Intatheli yeLisenethini

Usihlalo we-Baroka, uKhurishi Mphahlele, usedalule okuzokwenzeka ngomqeqeshi uMorgan Mammila kulandela ukuhluleka kweqembu kwiPSL Promotional/Relegation Playoffs.

Amathemba e-Baroka okubuyela kwiDStv Premiership ashabalele ngoLwesithathu ngesikhathi ishaywa kabuhlungu yiRichards Bay FC ngo 4-0 emdlalweni wokugcina. 

UMorgan Mammila uhole leli qembu esigabeni sokugcina sesizini enzima ngemuva kokuthatha izintambo kuDan Malesela.

UMalesela wamiswa kulandela ukuvela kwezinsolo zokuthi usiza amanye amaqembu ePSL ngokungemthetho ukuthola abadlali beBaroka.

UMammila ube ngumqeqeshi wesithathu ukucija iBaroka ngesizini ka-2023/24. UStanford Nkoane uxoshwe ekuqaleni kwesizini ngemuva kwemiphumela engemihle. UMalesela ube esethatha izintambo wakwazi ukuzibekisela indawo emidlalweni yokuhlunga. 

Nokho uhambe ngaphansi kwezimo ezingacacile, okuholele ekuqokweni kukaMammila.

Manje njengoba seyiphothulwe isizini, uMphahlele kulindeleke ukuthi athathe isinqumo ngekusasa likaMammila. 

“Umqeqeshi uyashintshwa manje namanje… Kusazoba nezinguquko ngomqeqeshi (nangokuzayo),” usho kanje uMphahlele kwabeFAR Post. 

“Ukushintsha umqeqeshi akuyona inkinga. Into enhle wukuthi sineqembu elihle, hhayi umqeqeshi. 

“Sesike sayinyusa iqembu noMorgan phambilini, sisangakuphinda lokho.

OLUNYE UDABA: Okwenze iChiefs ishwebe umgadli othathwe yiSekhukhune

“Usefunde okuningi kusuka lapho, usenamava, sonke sifundile. Sonke sesinamava – okufaka nabadlali.”

Yize engaphumelanga obala ngokuthi uzohlala noma uyahamba uMammila, uthe izinguquko zizoba khona eqenjini. 

“Iqembu lizohlelwa kabusha – belizohlelwa kabusha nooma ngabe besiphumelelile kweyokuhlunga. 

“Abanye abadlali bazothola amadlelo aluhlaza, bese thina sithole abanye abadlali abasebancane.”