Uzohlowa kwi-Orlando Pirates owase-England
– Intatheli yeLisenethini
I-Orlando Pirates izohlola umgadli wase-England okulindeleke ajoyine leli qembu uma seliqala amalungiselelo esizini ezayo.
Lo mgadli wase-England uzojoyina i-Orlando Pirates ekhempini yayo yokuqala okubhekwe ukuthi ibe seSpain.
Kuthiwa leli qembu lihlatshwe umxhwele uTremaine Eastmond kodwa imibiko iveza ukuthi isinqumo sokugcina asikathathwa ngokuthi uzosayinwa noma cha.
Ngokwamahlebezi akamuva ngokudayiselana kwabadlali, lo mdlali owake wagijima esikhungweni seBurnley e-England uzohamba nePirates baye e-Europe ekhempini yabo yokulungiselela isizini.
UJose Riveiro nethimba labaqeqeshi be-Orlando Pirates bazothatha isinqumo esingujuqu nge-Eastmond ngemuva komdlalo wabo neSevilla edlala kwiLaLiga.
Ngokubika kweSoccer Laduma, uTremaine Eastmond uzohamba nePirates aye eSpain ekhempini yayo ngoNtulikazi.
“Ngokusho kwemithombo, lo mdlali uhlabe umxhwele, kanti bekulindeleke ukuthi abuye azohlolwa ngesikhathi sangaphambi kwesizini ukuze kuthathwe isinqumo ngaye,” kubika leli phephandaba.
“Njengoba i-Orlando Pirates izimisele ngolunye uhambo lwase-Europe lokulungiselela isizini, u-Eastmond kulindeleke ukuthi ajoyine iqembu eSpain.”
Lo mgadli, oneminyaka engu-20, useke wabonakala kuleli njengoba ebekwiCape Town Spurs izinyanga ezintathu.
Nokho usheshe washiya kuleli qembu laseKapa ngezizathu ezingadalulwanga futhi ubengakazi adlale ngaleso sikhathi.
Kodwa manje sekungenzeka abuye esezodlala kulezi zinkunzi zaseSoweto ezibophele abagadli ababukhali.
Uma esayinwa kwiBucs, lokho kuyobe kusho ukuthi unethalente langempela ngoba leli qembu alishayi eceleni uma lisayina muva nje.
Kuzomele afike azibambe ziqine ke futhi ngoba iPirates ibophele izethenjwa zodwa phambili.
OLUNYE UDABA: Usekhonjwa phesheya obebhekwe kwiMamelodi Sundowns
Kukhona oTshegofatso Mabasa, Zakhele Lepasa, no-Evidence Makgopa okuyibo azobe ebanga nabo ijezi.
