Usekhonjwa phesheya obebhekwe kwiMamelodi Sundowns
– Alfred Ngubane
Kubukeka izoshweba kulokhu iMamelodi Sundowns kumdlali ebizimisele ngaye njengoba esetholelwe ikhaya phesheya.
Yize kungakaveli ukuthi yiliphi iqembu elimfuna phesheya, kodwa sekuvelile ukuthi iMamelodi Sundowns ayikho ezinhelweni zabaphathi bakhe.
Lo mdlali osemncane, uShandre Campbell weSuperSport United umataniswa neqembu lase-Europe la ezanyelwa khona umsebenzi.
Uzanyelwa yinkampani kaMike Makaab, iProSport International angaphansi kwayo.
Ngokubika kweSABC Sport, iSuperSport seyivele iqalile ukuhlwaya umdlali ozovala isikhala sikaCampbell eqenjini.
Lokhu kungenxa yokuthi ngisho umqeqeshi, uGavin Hunt useyazi ngokuthi uzobe engenaye lo mdlali ngesizini ezayo.
UCampell ube ngomunye wabadlali abagqamile ngesizini edlule ebisinda kuMatsatsantsa a Pitori.
Yikho lokhu okwebe amehlo eMamelodi Sundowns, yagcina seyimfuna lo mfanyana kodwa yathola ukuthi abaphathi bakhe bamatasa neqembu laphesheya.
OLUNYE UDABA: Bayisikhombisa abaphelelwa yizinkontileka kwiKaizer Chiefs
Ebuzwa uMakaab ngazi zindaba, uvele washaya ngamafuthi wathi mancane kakhulu amathuba okuthi lo mdlali abe kwiSuperSport ngesizini ezayo.
