Bafunwa elaseTshwane abachithwe yi-Orlando Pirates

– Intatheli yeLisenethini

Kubukeka bengeke bawaswele amaqembu abazodlala kuwo ngesizini ezayo abanye babadlali abachithwe yi-Orlando Pirates njengoba izihlela kabusha. 

I-Orlando Pirates seyivele ichithe abadlali abayizithupha njengoba ivula izikhala zabadlali abasha ezobasayina.

OSouaibou Marou, Fortune Makaringe, Kermit Erasmus, Siyabonga Mpontshane, Thabang Monare noRichard Ofori bachithwe yi-Orlando Pirates ngesonto elidlule. 

UMakaringe kubikwa ukuthi usevele usheshe walithola ikhaya elisha kwiCape Town City ka-Eric Tinkler. 

Yize leli qembu lingakakumemezeli ngokusemthethweni, kuvela ukuthi seliqede konke ngalo mdlali ozakhele ugazi kubalandeli beBucs ngomjiko. 

Manje sekuvela ukuthi uMonare no-Ofori nabo banesesheli esisha amashushu kwiSuperSport United kaGavin Hunt. 

UHunt uvele uzolahlekelwa unozinti abethembele kuye ngesizini edlule, uRicardo Goss njengoba ebuyela kwiMamelodi Sundowns abebolekwe kuyo. 

Manje u-Ofori ubukeka kunguye ongasivala kahle isikhala sikaGoss. 

Ngaphezu kokuhalelwa Amatsatsantsa a Pitori, kuthiwa u-Ofori uyafuneka nakwi Cape Town City. 

ICity nayo ichithe unozinti wayo, uBongani Mpandle kanti ifuna ukuqinisa konozinti. 

“U-Ofori ngeke aze awuswele umsebenzi ngoba ngathi kukhona naphesheya la efuneka khona.

“Kodwa ngiyasola uzohlala kuleli ngoba iSuperSport neCity bazimisele kakhulu ngaye,” kusho umthombo weLisenethini. 

Umqeqeshi weCity, u-Eric Tinkler, ukubeke kwacaca ukuthi manje usefuna ukusayina abadlali abazosebenzela leli qembu.

Uthi akasabafuni abezele ukuzozakhela igama ukuze bazithengise emaqenjini amakhulu ngoba lokho kwenza iCity ingakhuli. 

OLUNYE UDABA: Bazobhadla ejele abalahlwe yicala lokucwasa oweReal Madrid

U-Erasmus naye ukhonjwa kuyo iCity kanti kubadlali abadedelwe yiPirates obukeka esephelelwe yisikhathi uMpontshane njengoba lingekho iqembu elikhombisa intshisekelo ngaye.