Kuvela okwenze iChiefs ichithe uStanley Nwabali
– Sibongiseni Gumbi
Cishe ubeseyibalile imali yaseNaturena usihlalo weChippa United ngesikhathi etshela ukuthi iKaizer Chiefs ukuthi kungaxoxwa ngonozinti wakhe uStanley Nwabali.
Kuvela ukuthi leli qembu lase-Eastern Cape belizimisele ukumdedela ngemali encane kunale eyayishiwo uSiviwe Mpengesi ngesikhathi se-Africa Cup of Nations.
UNwabali wagila izimanga kulo mqhudelwano obuse-Ivory Coast waze waheha amehlo amaqembu aphesheya namanye kuleli.
Ngaleso sikhathi uMpengesi wathi ufuna u-R40-million kuya phezulu ngalo nozinti odabuka eNigeria.
KwiDstv Premiership, uStanely Nwabali, oneminyaka engu-27, akangenelwanga goli emidlalweni engu-11 kwengu-26 ayidlalile.
Ngokubika kweFARPost, umthombo osondelene nalamaqembu useveze ukuthi zike zaba khona izingxoxo phakathi kweChiefs neChippa ngalo nozinti.
IChiefs ivele isemkhankasweni wokuthola omunye unozinti njengoba u-Itumeleng Khune ezowabeka ethala amagilavu ekupheleni kwale sizini.
“Into eyavela kwiChiefs wukuthi bafuna uhlobo oluthile lukanozinti,” kusho lo mthombo.
“Ungunozinti omuhle, kodwa akayona neze lento abayifunayo bona.
OLUNYE UDABA: UTito Maswanganyi uzibona zinkulu agqokiswa zona
“Okunye okwavela wukuthi ngathi bafuna unozinti ozoba musha kwiPSL, yingakho balibonga ithuba lokusayina yena.”