Izinsolo ezingezinhle ngokweqiwa yijezi kukaMaema kwiDowns
Sekuvele izinsolo ezingezinhle ngesizathu okuthiwa yiso esenza uNeo Maema alithole amacozucozu ijezi.
UNeo Maema ngomunye wabadlali okwakubhekwe ukuthi bagile izimanga kwiMamelodi Sundowns.
Futhi esanda kufika izinto bezimhambela kahle, ebukeka ezogcina engumdlali omqoka eqenjini.
Kodwa ngokuhamba kwesikhathi ugcine esedlala esuka ebhentshini uma kwenzekile wadlala futhi akayena omunye wabadlali abawumgogodla weqembu.
ILisenethini seyithole ngemithombo yayo ukuthi okwenza lokhu ‘yingxabano’ eyaqhuma kubaqeqeshi.
Umthombo usitshele ukuthi umqeqeshi uSteve Komphela uhambe kwiSundowns isimo singasesihle kuye noRulani Mokwena.
“Manje ngenxa yokuthi uMaema wafika ngoSteve eqenjini, kuyacaca indawo yakhe izoncipha njengoba engasekho.
“Futhi ngeke ngithuke uma ngesizini ezayo ebolekiswa eqenjini elizobe liqeqeshwa uSteve,” kusho lo mthombo.
Uthe uKomphela uke wazama vele ukuthola lo mdlali ngesikhathi ekwiMoroka Swallows kodwa wancishwa yena.
UMaema ujoyine iSundowns esuka kwiBloemfontein Celtic ngesizini ka-2021/22, esayina inkontileka yeminyaka emihlanu.
COFA LA, UTHOLE KUNGANI UBROOS EZOTHEMBELA KUMOFOKENG
UKomphela nguye owanyusela uMaema eqenjini elikhulu ngo-2018 ngesikhathi engumqeqeshi weBloemfontein Celtic.
