Sekukhale izembe komunye wabaqeqeshi beChippa

May 29, 2024 1 min read

– Alfred Ngubane

I-Chippa United isikuphindile lokho ixosha omunye wabaqeqeshi bayo abathathu kusanda kuphela isizini nje.

Kuvela ukuthi isimkhombe indlela uMorgan Mammilla obephethe ithimba labaqeqeshi futhi eyiso likasihlalo eqenjini.

I-Chippa ivele idume ngokusheshe ixoshe kubaqeqeshi uma kukhona abaphathi abangakuboni kahle.

UMammilla akucaci ukuthi ngabe uxoshelweni manje ngengoba akaqali ukuxoshwa nguSiviwe “Chippa” Mpengesi ongusihlalo weqembu.

Kuqale ngokuthi ehliswe esikhundleni sokuba ngumqeqeshi, wanikwa esokuphatha kodwa waqhubeka nokuhlala ebhentshini.

Kwaqashwa uThabo September noKwanele Kopo abaphuma kwiSuper Sports United ukuba ngabaqeqeshi ngokubambisana.

UMammilla ungumqeqeshi othanda ukuchoma ngemiphumela ayitholayo uma imihle. Uchoma ukufa ikakhulukazi uma ngabe enqobe kwiKaizer Chiefs, angayizwa nhlobo.

Alimsindi ukukhuluma ngalo kune-Orlando Pirates noma iMamelodi Sundowns abavamise ukumthela induku.
Uxoshwa nje ubesanda kuqedela izifundo zeCaf B License okumenza abe neziqu ezifanele ukuthi aziqeqeshele ngayedwana.