UDoctor Khumalo uhlonza okushodayo kwiChiefs
Isilomo sakudala seKaizer Chiefs, uDoctor Khumalo, sigcizelela ukuthi umqeqeshi omusha waleli qembu kuzomele kube ngumuntu ozigqajayo ukuze atholelwe abadlali abasezingeni eliphezulu.
IChiefs ibe nesizini embi kakhulu selokhu kwasungulwa iPremier Soccer League (PSL).
Lezi zinkunzi zaseSoweto ziqede endaweni yeshumi, zahluleka wukungena emqhudelwaneni weMTN8 ozoqala ekuqaleni kwesizini ezayo.
IChiefs ilethe uMolefi Ntseki njengomqeqeshi ngaphambi kokuthi kuqale isizini kodwa wagcina ehlale izinyanga ezine kuphela.
UCavin Johnson uqokwe njengomqeqeshi wesikhashana kodwa wangakwazi ukusiza Amakhosi aqede kwiTop 8.
Kule mpelasonto edlule, uDoctor Khumalo uthe iKaizer Chiefs ayisenaso isithunzi kulezi zinsuku futhi umqeqeshi omusha kuzodingeka akwazi ukusibuyisa.
“Kube ngenxa yenqumo yokushintshashintsha abaqeqeshi eyenze kwagcina kuphela ilaka lokulangazelela ukunqoba.
“KwiKaizer Chiefs uma ubheka usihlalo indlela ayiyo, ikutshela okuningi yena engazange asho lutho.
“IKaizer Chiefs beyihlezi inomqeqeshi ozigqajayo nozazisayo,” kusho uDoctor Khumalo kwiSABC Sport ngempelasonto.
Amakhosi ahlulekile ukunqoba okusandebe kule sizini, kanti manje sekuphele iminyaka eyisishiyagalolunye ingaziwa indebe eNaturena.
“Abadlali kumele bakuqonde ukuthi yiKaizer Chiefs lena futhi inabalandeli abajwayele ukunqoba izindebe.
“Ngesikhathi ngisayina, bebenabadlali abahamba phambili abangu-12 kuya ku-14 ekilabhini…
“Ngafakwa ngaba yingxenye yalokho. Bangiluleka, bangigada, bakha ukubumbana nokuziqhenya siyiqembu.
“Ngeke uthi uyobhekana nabantu bebe bengathuki nakancane nje, lokho kufana nokuthi sewuvele wehluliwe,” kusho uKhumalo.
IKaizer Chiefs ilande abadlali abasha abayisishiyagalolunye nomqeqeshi kodwa yahluleka kanti uKhumalo usola ukuntuleka kobuholi.
OLUNYE UDABA: UJohnson neseluleko kwiChiefs ngo-Itu Khune
Le nkakha eneminyaka engu-56 eyake yagijima kwiBafana Bafana, ithi kuningi okonakele eqenjini futhi ngabaphathi kumele balungise isimo.
