Ramovic: Uzodinga oMbappe, Messi noRonaldo ukushaya mina

Umqeqeshi weTS Galaxy, uSead Ramovic, uchomele uzakwabo weMamelodi Sundowns uRulani Mokwena ngokuthi udinga ukunyusa izifundo zakhe ukuncintisana naye.

URamovic uthi ngisho iSundowns ichithe imali eshisiwe ukuthenga abadlali, kodwa ngeke elakhe iqembu balenze lutho. 

Lokhu ukusho ngemuva kokubambana kwalamaqembu emdlalweni wegqubu eMbombela Stadium ngoLwesibili ebusuku.

Umdlalo – obushubile futhi unezigemegeme ezimangazayo enkundleni nangaphandle – uphele ngo 1-1. 

“Lokhu kukhombisa ngokusobala ukuthi awunqobi ngokuba nabadlali ababiza izigidi kodwa unqoba ngokuzimisela kwabadlali,” kusho uRamovic ngemuva komdlalo.

“Awudingi ukusebenzisa u-R200 million ukuze unqobe imidlalo…” 

Ube esengena kuMokwena, ambiza ngoMr Sunshine, ethi elakhe iqembu liyithola ngokuzimisela imiphumela, hhayi ngokuthenga abadlali ababizayo.  

“Lokhu wumphumela wokusebenza kanzima… mhlawumbe uMr Sunshine kumele akwazi lokho. 

“Ukuze alunge la kimi kumele enyuse izifundo zakhe noma ke alande abanye abadlali abaphezulu… OMbappe, Cristiano Ronaldo noMessi.”

Impi yalaba baqeqeshi ibukeka izolenyusa izinga lokuncintisana phakathi kwalamaqembu abo.

Kumanje lokhu kugudlana ngamazwi ngaphambi nangemuva kwemidlalo yabo sekuyicala elisenkantolo. 

OLUNYE UDABA: UBarker akathandi u-Adams aye kwiDowns, uveza isizathu

IGalaxy ibopha uMokwena ngakusho emdlalweni wangomhla ka-29 kuMbasa la ayisola ngokuthi imlimaze ngabomu uBongani Zungu.