UMiddendorp uhlulwe yimpi ajwayele ukuyinqoba
– Alfred Ngubane
Imizamo ka-Ernst Middendorp iphelele ezeni kuhle kwezithukuthuku zenja njengoba iCape Town Spurs igawulwe yizembe kwiDStv Premiership.
ISpurs ikhushulwe uShaun Bartlett eyisusa kwiMotsepe Foundation Championship, eyisa kwiPremiership, inqoba imidlalo yokuhlunga.
Leli qembu liqale imidlalo yePremiership kunethemba lokuthi lizothola uzinzo futhi linesasasa ngenxa yomlando walo omude ebholeni lakuleli.
Kodwa ngokuqhubeka kwemidlalo kwacaca ukuthi liyimfene abathi beyihlinza ibe ihleka.
Lishaywe imidlalo ilandelana, kwacaca ukuthi kudingeka abadlali banamava kodwa baphathi bazindezela nje.
Bagcine besithola isibindi sokushenxisa uBartlett, balanda u-Ernst Middendorp ongumakadebona ebholeni lakuleli.
U-Ernst Middendorp sekukaningana evikisa amaqembu izembe futhi ufike noguquko olubonakalayo.
Ukunqoba kwakhe kwi-Orlando Pirates ekuhambeni kwakhomba ukuthi izinto zingajika ngampela.
Nokho leyonhlansana yethemba yasheshe yacisha leli qmebu selibuyela emkhubeni omdala wokuphisana ngamaphuzu.
ISpurs izamile ngewindi lokusayina abadlali likaMasingana ukuqinisa ngokulanda abanye abadlali.
Yize umehluko ube khona uma ubheka indlela iqembu ebelizimisela futhi lidlala ngayo, kodwa imiphumela ilinqabile.
Ukuthi lizibe ligijima kwiChampionship ngesizini ezayo kuqinisekiswe wukunqoba kweRichards Bay kungalindele muntu kwiPirates.
EzikaVusumuzi Vilakazi ziqumbe phansi iBucs ngo 1-0 emdlalweni obuse-Orlando Stadium ngoMgqibelo ebusuku.
Lokhu kuzenze zaba namaphuzu angu-27, okuyisibalo i-Urban Warriors engeke isafikelela kuso noma ingayinqoba yonke imidlalo esele.
OLUNYE UDABA: Abadlali bakhona, kushoda uhlaka kwiChiefs – Shabba
Izothi iyosithela ehlathini iSpurs ibe ilokhu ijeqeza emuva ukubona ukuthi ubani oyilandelayo phakathi kweBay Royal AM, AmaZulu FC, Chippa United neMoroka Swallows.
