Udube waqonda ekhaya uKhama Billiat ekhishwa ngelibomvu
UKhama Billiat, owake wadlalela iKaizer Chiefs neMamelodi Sundowns, uthole ikhadi elibomvu ngesikhathi iYadah Stars ishaywa ngo 1-0 yiHerentals FC.
Lo mdlalo weZimbabwe Castle Lager Premiership ubungoMgqibelo ntambama eRufaro Stadium, eHarare.
Igoli likaGodfrey Makambi elingene ngomzuzu ka-11 liqinisekise ukunqoba kweHerentals.
Bekungokwesibili leli qembu linqoba emidlalweni eyisishiyagalolunye.
IYadah Stars ingene kulo mdlalo isemuzweni kulandela ukunqoba ngo 2-1, ishaya iChicken Inn, nalapho uBilliat eshaye khona amagoli amabili.
Lo mdlali obekwiChiefs ngesizini edlule kodwa wayilaxaza ekuqaleni kwalena, usenamagoli amathathu.
Ukukhishwa kukaKhama Billiat ngekhadi elibomvu kwenzeke ekuqaleni kwesiwombe sesibili kulandela ukuthi unompempe engakuthandanga akushilo.
Okuthusile ke wukuthi ube ukukhishwa ngekhadi elibomvu, uKhama Billiat wathatha indodakazi yakhe bahamba.
OLUNYE UDABA: UMokwena uyoziphendulela eZulwini – Ramovic
Akazange ahlale ezihlweleni njengokuvamisile kumdlali okhishwe ngekhadi elibomvu.
AKukacaci ke ukuthi iqembu lakhe lizothini ngalesi senzo sakhe esingazwakali kahle kumdlali wezinga elikhokhelayo.
Umqeqeshi weYadah, uThomas Ruzive, ukhethe ukungaphawuli ngqo ngalesi simo sikaBilliat kodwa uvumile ukuthi kube nomthelela emathubeni abo okuthola umphumela omuhle.
“Ngeke ngikwazi ukusho okuningi ngekhadi elibomvu likaBilliat ngoba angazi ukuthi kwenzekani ngempela,” ucashunwe esho kanje lo mqeqeshi yiFAR Post.
“Kusithikamezile kakhulu. Abafana bethu badidekile kancane, kwathi lapho sebephinde bagxila emdlalweni, kwaba wukuthi isikhathi asisekho.”
Ngalesi sigameko, iYadah Stars izithola isisendaweni yezembe njengoba isaqoqe amaphuzu angu-10 nje kuphela.
Ngaphezu kwalokho, uBilliat uzobe engadlali emdlalweni olandelayo, la bezobhekana khona nezinkunzi zaseHarare iCaps United.
