Akayizwa eyikungena kweDowns kwiClub World Cup
– Alfred Ngubane
UMamadou Gaye, ongumhlaziyi webhola odabuka e-Ivory Coast, usola ukwenzelelwa kweMamelodi Sundowns ebholeni lase-Afrika.
Uthi ubona ukuthi iSundowns ingene ngomnyango wangemuva ekubeni yingxenye yamaqembu azodlala kwiFifa Club World Cup ngonyaka ozayo.
UMamadou ukholwa ukuthi bekungafanele iSundowns ibe ngelinye lamaqembu azodlala lo mqhudelwano ozoba namaqembu angu-32 okokuqala ngqa.
Lamaqembu azogadulisana e-USA. UGaye uthi iSundowns yazihlulekela kubuka umhlaba ishaywa yi-Esperance yaseTunisia emdlalweni owandulela owamanqamu weCaf Champions League.
“Ngimangazwa ukuthi iMamelodi Sundowns ngabe ngempela bayifakeleni ngomnyango wangemuva,” kusho uGaye.
“Ngikubona kube wukwenzelela okwenziwa ngomengameli oweFifa uGianni Infantino noweCaf uPatrice Motsepe.”
OLUNYE UDABA: Udliwe yizembe phesheya obegijima kwiKaizer Chiefs
Kuzokhumbuleka ukuthi u-Infantino nguye owabhalela iPSL eyazisa ukuthi iSundowns izodlala kwiClub World Cup ngonyaka ozayo e-USA.
NeFifa yakhipha isitatimende icacisa ukuthi iSundowns iyaya kulo mqhudelwano.
“IMamelodi Sundowns ne-ES Tunis bangamaqembu lesithathu nelesine kwaweCaf ukuzibekisela indawo kwiMundial de Clubes Fifa (Fifa Club World Cup 2025).
“Bagcwalise izikhala zamaqembu ase-Afrika kulo mqhudelwano.
“Njengoba i-Al Ahly yase-Egypt eke yanqoba ngaphambilini idlulele kowamanqamu kwiCaf Champions League, iqembu laseNingizimu Afrika neqembu laseTunisia manje sebeqinisekisiwe ukuthola ithikithi lokuya kwiFifa Club World Cup ngokukleliswa.”
Okwasiza iSundowns wukuthi iTP Mazembe yaseDR Congo yona yahlulwa ngo 3-0 yi-Al Ahly kweyandulela owamanqamu kwiChapions League.
ISundowns iqathwe eqoqweni elilodwa neChelsea yase-England, phakathi kwamanye amaqembu.
