Inkinga enkulu ebhekene noJohnson weChiefs
IKaizer Chiefs kumele izihlele kabusha emuva uma seyibhekene neMamelodi Sundowns kuleli sonto.
Leli qembu likaCavin Johnson libhekene nenkinga yokumiswa nokulimala kwabadlali basemuva.
Umdlali wasemuva odabuka eMozambique, u-Edmilson Dove ngeke adlale kulo mdlalo osuvele ubhekwe ngabomvu.
UDove umisiwe ngemuva kokuqoqa ikhadi lakhe lesine eliphuzi ngesikhathi bebhekene neSuperSport United ngempelasonto.
Lokho kushiya uCavin Johnson eshoda kakhulu emuva maphakathi nenkundla.
Kuzodonsa amehlo ukuthi uzomisa kanjani. Kuphakathi kokuthi asebenzisa uThatayaone Dothlokwe osanda kubuya ekulimaleni noma uZitha Kwinika.
Omunye umdlali abengamsebenzisa kule ndawo, uNjabulo Ngcobo yena ulimele.
IChiefs izobe ibheke ukuzizwisa kwiSundowns esehlelwe wukuzethemba kulandela ukuphoxeka kwiCaf Champions League.
ISundowns igilwe yi-Esperance yaseTunisia, iyiwashisa ijezi kulo mqhudelwano ebizibheke kakhulu kuwo.
OLUNYE UDABA: UManyisa uveza ithuba alincishwa lokuya kwiMan United
IChiefs yona ibuyise ukuzethemba ishaya iSuperSport ngo 2-1 ngempelasonto, iqeda le nyanga yonke inganqobi.
Amagoli kaChristian Saile noMduduzi Shabalala yiwo aweze Amakhosi kulo mdlalo obusePeter Mokab aStadium.
Lamagoli aqede nendlala yemidlalo emine la Amakhosi abehluleka khona ukubhakuzisa inethi.
Amakhosi azokwamukela iSundowns ngoLwesine mhla ka-2 kuNhlaba ngo-7.30 ebusuku eFNB Stadium, ngaseSoweto.
