Ubhodla umlilo ngonompempe ‘ababulala ibhola’
Umqeqeshi weTS Galaxy, uSead Ramovic, unethemba lokuthi onompempe bazokwenza kangcono uma ezakhe sezibhekene neMoroka Swallows emdlalweni weDStv Premiership eMbombela Stadium ngoLwesihlanu ngo-7:30 ebusuku.
URamovic ulandele abanye abaqeqeshi asebezwakalise ukuphatheka kabi ngonompempe abangenzi kahle kwiPremier Soccer League.
Lokhu kuza ngemuva kokuthi iTS Galaxy ihlulwe ngo 2-1 ibhekene neStellenbosch FC enkundleni efanayo ngeSonto eledlule.
URamovic ukholelwa ukuthi onompempe badinga izifundo ezifanele ukuze benze umsebenzi ongcono enkundleni.
“Sizama ukwenza ngcono futhi siwine ngoba yisinkwa sethu, bese uyadumala uma ubona onompempe abathuthuki,” usho kanje kwabezindaba kuleli sonto.
“Ngiyafisa ukubona onompempe bethola usizo ngokuba sezingeni eliphezulu.
“Uma sifuna kuthuthukiswe onompempe, kumele benze izinto zibe ngcono njengemfundo yabo futhi babe sezingeni eliphezulu.
“Lokho kuzokwenza iligi ibe ngcono ngoba sidinga onompempe abasezingeni eliphezulu futhi abahlwa umsebenzi bayalibulala ibhola,” usho kanje.
Omunye umqeqeshi osanda kubhonga emswaneni onompempe sebemgilile uPablo Franco waMaZulu FC.
NALU OLUNYE UDABA: IRichards Bay ilaxaze ebimlande kuMsinga United
Emidlalweni emibili bebhekene ne-Orlando Pirates, lo mqeqeshi uphume ekhala ngokuthi ezakhe zibanjwe ngophondo.
