UKoloba ukhala ‘ngezwaca’ eliwuXulu kwiBafana
UNtokozo “uKoloba” Sikhakhane usola ugcobho ngokuqokwa kukaSiyanda “Magazi” Xulu kwiBafana Bafana, kusale izitobha ‘ezingcono’ kunaye.
Le nkakha eyagijima kwiKaizer Chiefs neBlomfontein Celtic ithi iSafa kumele ike ibhekisise ukuthi akukho yini ukwenzelela ekuqokweni kwakhe.
UKoloba usole imenenja yalo mdlali, esiligodlile igama layo okwamanje, wathi kusamele ike iphenywe kwazise bekugcwele abadlali bayo kwiBafana.
“Njalo kuqubuka imibuzo eminingi ngoXulu,” kusho uKoloba exoxa neMpempe kuleli viki.
“Kumanje akasitholi isikimu eqenjini lakhe iSuperSport United. Kodwa uyathathwa uyodlala kwi-Africa Cup of Nations…
“Kukhona abadlali abadlala njalo emaqenjini abo abashiyiwe njengoTapelo Xoki we-Orlando Pirates.
“UXoki udlala njalo kwi-Orlando Pirates (futhi ungukaputeni). Useyisize kakhulu emidlalweni eminingi.
“(UXulu) Noma ngabe udlala phesheya kwezilwandle usuke ehlala ebhentshini.
“Kuzomele ngempela aphenywe u(egagula igama lemenenja) ngoba lento ubeyenza nango-Aaron Mokoena.
“Nalowo wayeboza kaningi kodwa belokhu bembiza, kuthiwe uyahlonipha kodwa ebe edlisela izwe.”
USikhakhane usole uXulu nangokuthi unanebhajana ahamba nalo njengoba emidlalweni adaliswe kuyo kuyibhimbele iBafana.
“Kubuhlungu ngoba abafana beMamelodi Sundowns badlale kahle ngaphandle kukaXulu yonke le midlalo bayinqoba.
“Emidlalweni embili ayidlalile yadliwa iBafana Bafana. Nomdlalo omqoka weNigeria ubekhona. Uyalibona ukuthi yizwaca leli.”
UKoloba sole ukuthi kukhona umkhonyovu okhona, athi vele yinto endala ebholeni lakuleli.
“Mina ngiyazi ukuthi kuningi ukukhohlakala kulezi zimenenja zabadlali bebhola.
OLUNYE UDABA: Uzibona eshiphelwe iqaqa uMahachi oxoshwa njalo
“Kumanje ufuna ukumfunela iqembu phesheya asebenzise le midlalo (ye-Afcon) enabadlali abamqoka kakhulu ebholeni lase-Afrika.”
