Afcon 2024Ezintsha

Izimanga zikaRonwen Williams zithele okuhle kwiBafana

Yize iBafana Bafana ingafikanga kowamanqamu we-Africa Cup of Nations (Afcon) ka-2023, kodwa izobuya e-Ivory Coast ihlonishwa ngendlela edlale ngayo.

Eqenjini lesizwe lakuleli kugqame ubuqhawe bukaRonwen Williams, othole umklomelo kanozinti obaqwaqwade emakhanda bonke kwi-Afcon.

Lo nozinti weMamelodi Sundowns ungenelwe amagoli amathathu kuphela emqhudelwaneni wonke.

Emidlalweni emihlanu akazange adedele nelilodwa igoli nokuyinto eyenze ukuthi athole lo mkomelo.

Kuleyo midlalo yilapho iNingizimu Afrika ishaye khona iNamibia ngo 4-0, yadlala ngokulingana neTunisia ngo 0-0 kweyamaqoqo.

URonwen Williams uphinde wangangenelwa yigoli ngesikhathi iBafana ishaya iMorocco ngo 2-0 kwiLast 16, nangesikhathi ibambana neCape Verde ngo 0-0 kwi-quarterfinal, lapho yagcina iwine ngo 2-1 kumaphenathi.

Ngesikhathi sekukhahlelwa amaphenathi uRonwen Williams uqophe umlando evimba amane, yadlulela kowandulela owamanqamu iBafana Bafana.

Emdlalweni wokugcina odlalwe yiBafana Bafana kwi-Afcon iphinde yangalidedela igoli, ibhekene neqembu elinzima iDemocratic Republic of Congo, kowokuhlunga iqembu elilale isithathu.

Umdlalo uphele ngo 0-0 iBafana Bafana yawina ngo 6-5 sekukhahlelwa amaphenathi. Ibe seyithola izindondo zethusi.

INingizimu Afrika iphinde yathola umklomelo iCaf Fair Play Team Award ngesikhathi sekukhishwa imiklomelo.

I-Ivory Coast, ebingosokhoya, ishaye iNigeria ngo 2-1 kowamanqamu, yakhala yemuka nendebe ye-Afcon.

Ngokufinyelela kweyandulela owamanqamu ye-Afcon, iBafana Bafana izothola u-R47 million. 

Kuvela ukuthi abadlali bazohlukaniselana uhhafu wale mali, nokuchaza ukuthi emunye uzothola u-R1 million.

IBafana Bafana kulindeleke ukuthi itheleke kuleli ngoLwesithathu. Imidlalo yeDStv Premiership ebizodlalwa ngoLwesibili nangoLwesithathu ihlehlisiwe yiPremier Soccer League.