Uma singadlula kwiMorocco singaya kude – Broos
Ukuqhubekela phambili kwi-Africa Cup of Nations (Afcon) kweBafana Bafana, kuncike ekutheni izodlula yini eqenjini elinzima ezobhekana nalo.
IBafana izobhekana neMorocco emdlalweni weLast 16 ye-Afcon ngoLwesibili ngo-10 ebusuku.
Ngokwezinombolo zakamuva, iMorocco yilona izwe elikleliswe eqhulwini e-Afrika.
Leli lizwe lihambe ibanga elide kwiNdebe yoMhlaba, eQatar, ngo-2022.
IMorocco imangaze abaningi ifinyelela kweyandulela owamanqamu kulo mqhudelwano.
“Kuphakathi kokuthi uyawina noma uyakhishwa (emqhudelwaneni),” kusho uHugo Broos.
“IMorocco yiqembu elizihola phambili e-Afrika. Baba nohambo oluhle eNdebeni yoMhlaba.
“Nokho lena yi-Afcon emangazanayo kakhulu. Amaqembu amakhulu avele asesemakhaya.
“Sabashaya ngoJuni ngakho singakuphinda lokho.”
Egcina ukuhlangana la maqembu bekungumdlalo wokuhlungela i-Afcon eNingizimu Afrika nyakenye.
IBafana iwine umdlalo ngo 2-1 kodwa womabili amaqembu ayesevele esenalo ithikithi lokuya e-Ivory Coast.
Amaqembu amakhulu afana neGhana, yi-Algeria, yiCameroon ne-Egypt, asevele aphumile kwi-Afcon.
“IMorocco ayidlalanga kahle emidlalweni yamaqoqo. Besiyilandela futhi siyazi ukuthi singakwazi ukuyishaya,” kuqhuba uBroos.
“Ithemba lokuthi sizofinyelela kuma-quarter likhulu kakhulu.”
OLUNYE UDABA: Nakhu okwenze iPirates imdedele uLorch, iDowns imnqake
Uma iBafana idlula kwiMorocco izobhekana noyedwa phakathi kweCape Verde neMauritania.
