DStv PremiershipEzintsha

Ubuyeka ekhaya kwiSundowns unozinti obebolekisiwe

IMamelodi Sundowns seyithathe isinqumo yokuthi abuyele eChloorkop unozinti wayo, obolekiswe kwiSuperSport United, uRicardo Goss.

UGoss usehlale kwiSuperSport (ebolekisiwe) kusukela ekuqaleni kwesizini edlule.

Ngokusho kukaStan Matthews, oyisikhulu esiphezulu kwiSuperSport, lo nozinti kuzomele abuyele eqenjini lakhe ngoJuni, njengokwesivumelwano samaqembu womabili.

“Sengizamile ukuxoxa neSundowns kodwa baveze ukuthi kumele abuyele ekhaya,” kusho uMatthews.

“Ngakho akusekho ezandleni zami, futhi kumele ngihloniphe lokhu okufunwa yiSundowns.

“Sasisayine isivumelwano seminyaka emibili futhi kumele ngikuhloniphe abafuna ukukwenza.”

URicardo Goss use-Ivory Coast neqembu lesizwe iBafana Bafana, lapho beyibambe khona kwi-Africa Cup of Nations ka-2023. 

Nokho kuhlale kuvimbe uRonwen Williams abasuka naye kwiSundowns kwelesizwe. 

“Uma befuna ukubuyisa uRicardo Goss kulungile, ungumdlali wabo futhi kumele ngiqhubekele phambili ngithole omunye,” kuqhuba uMatthews.

“Usebe ngumdlali obaluleke kakhulu eqenjini lethu. Ngenxa yakhe siqede endaweni yesithathu (kwilogi) ngonyaka odlule.

“Ngicabanga ukuthi yinto enkulu kuyena ukuba yingxenye yeBafana Bafana, lapho encintisana khona noRonwen Williams.

“Manje usezoncintisana naye ezingeni leqembu (iSundowns). Kumele ngiqhubekele phambili.”

Ngaphandle kukaWilliams, ovimba njalo kwiDowns, kukhona uDenis Onyango noReyaad Pieterse. 

UPieterse usanda kuveza ukuthi ngeke ayishiye iDowns uzoyilwela indawo yakhe yize elizwa ngendaba ijezi.