UMiddendorp uveza okungamphendula ihlaya kwiDowns
Umqeqeshi okufanele ukuthi uyena onengcindezi ukubadlula bonke kwiDStv Premiership, u-Ernst Middendorp usevuleke ngesimo abhekene naso kwiCape Town Spurs.
Leli qembu laseKapa lisaqoqe amaphuzu amane kuphela emidlalweni angu-16 njengoba lisanqobe kanye, ladlala ngokulingana kanye.
Yilo elisemsileni kwilogi yePremiership kanti kumanje limatasa lizama ukuqinisa ukuze lilwe impi yokuvika izembe selingcono.
Njengoba kuvulwe iwindi lokuthengiselana ngabadlali kwiPSL nje, iSpurs ngenye yamaqembu okubhekwe angene kakhulu emakethe.
Ngokubika kwe-iDiski Times, u-Ernst Middendorp usezinhlelweni zokuqinisa yonke imikhakha kuleli qembu.
Ucashunwe ethi ngokwakhe ubezothi uma ebuyela enkundleni, ebe enabadlali abangu-11 abasha bodwa eqenjini eliqala umdlalo.
Lokhu kuveza ngokusobala inselelo ebhekene no-Ernst Middendorp kuleli qembu elixoshe uShaun Barlett, lalanda yena.
Lo mqeqeshi osesebenze emaqenjini amaningi ehlukene okubalwa neKaizer Chiefs, uthi iphakethe selivuliwe, kusele bathole abadlali abasezingeni.
“Inkinga akuyona imali njengamanje, inkinga wukuthi abadlali abasezingeni uzobatholaphi,” usho kanje.
“Uma ngingaya kwiSundowns njengamanje ngithi kuyo, ‘ngifuna uRonwen Williams’ bengavele bangihleke.
“Bengangihleka bese bethi, ‘ awubuye uzame ngokuzayo…’ Siwavule wonke amehlo kusukela emasontweni edlule.
“Siyaxoxa kakhulu futhi siyazama ukuthola abadlali esingabheka kubo,” kuchaza lo mqeqeshi odume ngelikaMazinyo.
“Kodwa okwamanje ngeke ngisho ukuthi yini engenzeka. Inkinga akuyona imali, inkinga sekuwukuthi umtholaphi umdlali ofanele ozokwazi ukusisiza.”
Impempe isike yabika ukuthi uLungelo Bhengu, obekwiMaritzburg United ngesizini edlule, ngomunye wabadlali ababhekwe kwiSpurs.
Kusanda kuvela nokuthi uMiddendor ufuna ukubuyisa uFriday Samu waseZambia abesebenza naye kuyo iMaritzburg phambilini.
OLUNYE UDABA: Sisabhibha kuLebo Mokoena isilonda asilimala kwiDowns
USamu ubuyele ngakubo eZambia ngemuva kokungavumelani neMaritzburg ngenkontileka entsha.
