Izinkulumo iChiefs nePirates bexhaswa inkampani yokubheja

I-Orlando Pirates neKaizer Chiefs sebezoxhaswa yiSuperSportBet okuyinkampani entsha yokugembula, esanda kwethulwa abakwaSuperSport.

IPirates ayicucuzanga ukuqinisekisa ubudlelwano neSuperSportBet kwi-X ngoLwesine ntambama. 

NeChiefs ikuvezile ukuthi nayo iyingxenye yalesi sivumelwano sokusebenzisana nale nkampani.

Siye koshicilela ingekho imininingwane eminingi mayelana nalesi somemezelo ebesingalindelekile.

Lokhu kwenzeka kusenemibuzo mayelana nemigomo yePremier Soccer League (PSL) uma kukhulunywa ngokuxhaswa kwamaqembu angaphansi kwayo.

Kusanda kuvela ukuthi iPSL yashaya phansi ngonyawo ngesikhathi iTelkom izama ukusebenzisana neMoroka Swallows kumasizini edlule.

NeGoldrush, okuyinkampani yokugembula ibizama ukuba nesivumelwano neSwallows kodwa kwathiwa kukhona imigomo yePSL engazange iyilandele.

Kuyimanje iZinyoni azinayo imali futhi abaphathi bazo abakufihli ukuthi bangase badayise uma bengabatholi abaxhasi.

ISwallows ibivele phambi kwekomiti eliqondisa ubugwegwe ngoLwesine. 

Lokhu kulandela ukuhluleka ukuya emidlalweni emibili yeligi lapho kwakufanele idlale neMamelodi Sundowns kanjalo neLamontville Golden Arrows, ngoDisemba.

FUNDA NALA: UThabo September uyijabulele inselelo yeChippa exoshanayo

Ngokuchaza kwabaphathi beSwallows lokhu kwabangelwa ukungaboni ngaso linye phakathi kwabo nabadlali. Abadlali babekhala ngokuthi abaholile.