DStv PremiershipEzintsha

Useshaywe ngesthende uMorgan Mammila kwiChippa

UMorgan Mammila ngeke asifeze isifiso sakhe sokuba ngumqeqeshi wokuqala ukuqala aze aqede isizini kwiChippa United. 

Yize engaxoshwanga uMorgan Mammila ekubeni ngumqeqeshi kwiChippa, kodwa ushenxisiwe, wanikwa esinye isikhundla.

Kusukela manje lo mqeqeshi odabuka eLimpopo futhiingumgani kasihlalo weChippa uSiviwe Mpengesi usezoba ngumphathi wethimba labaqeqeshi.

Ekuqaleni kwesizini uMammila wazibekela umbandela wokuthi abe ngumqeqeshi wokuqala ukungaxoshwa kulesi sikhundla sokucija iChippa.

UMpengesi usenegama elibi ebholeni lakuleli ngenxa yokuba nesandla esilula kwakhe uma kuziwa ekuxosheni abaqeqeshi. 

Kodwa kulokhu umbekezelile uMammila njengoba namanje engamxoshanga kodwa embuyisele eceleni.

Esitatimendeni seqembu esikhishwe ngoLwesibili ntambama, iChippa ithe uMammila uzosuka ekucijeni iqembu ayophatha abaqeqeshi.

Iqembu selizocijwa ngokubambisana nguThabo September noKwanele Kopo abake basebenza ezinhlakeni zokukhulisa abadlali kwiSuperSport United. 

Ngesizini edlule uKopo ubecija iPretoria Callies kwiMotsepe Foundation Championship njengoba esethola ithuba lokuqeqesha okokuqala esigabeni esikhulu manje.

USeptember yena ubengumdlali kwiSuperSport ngaphambi kokuthi awaphanyeke emgibeni amakhokho bese engena emkhakheni wokuqeqesha.

Naye ngumsebenzi wakhe wokuqala lona engumqeqeshi ezingeni eliphezulu. 

Ngaphambi kokuthi uMammila asuswe kulesi sikhundla, uke washokwa ngoVusumuzi Vilakazi owalaxa iGolden Arrows.

Wayeqashelwe ukuba ngumphathi wethimba labaqeqeshi kodwa esebenza ngokusondelana noMammila.

Nokho naye usheshe washiya, wabe eseqashwa yiRichards Bay la asengumqeqeshi obambile kulandela ukuxoshwa kukaKaitano Tembo. 

“Iqembu lemukela uThabo September noKwanele Kopo okungabantu abanegama ebholeni lakuleli, abazoba ngabaqeqeshi ababambisene” lisho kanje leli qembu esitatimendeni.

Libe seliqhubeka licacisa ukuthi lizimisele ukuphakamisa igama lesifundazwe i-Eastern Cape ebholeni yingakho lenza lezi zinguquko.