Izinkunzi zaseGauteng zicathamela umdlali waMaZulu
Kukhona amaqembu amabili aseGauteng afuna ukufongqa izigqoko, acele ubuhlobo obuhle kuMaZulu FC ngoJanuwari njengoba esebone imbali enhle.
Kubukeka kuzoba yinkinga ke nokho oSuthwini ukuvuma nalo mdlali njengoba nawo evele engaqinile ngokwanele kule ndawo adlala kuyo.
Ngokubika kweSNL24, uTshepang Maremi usedonse amehlo e-Orlando Pirates neMamelodi Sundowns.
Kuthiwa lamaqembu kumanje asezinhlelweni zokuyobeka okuthile etafuleni Osuthwini ukuze kuxoxiswane ngokudayiselana ngalo mdlali.
“Njengoba wazi lo mfana ubebolekisiwe ngesizini edlule ngemuva kokuthi enyuselwe eqenjini elikhulu esuka enkulisa,” kucashunwe umthombo usho kanje.
“Iqembu libonike ukuthi wenza kahle, ukhomba ukukhola labe selimbuyisa ekuqaleni kwesizini.
FUNDA NALA: Mayele: ISundowns ingincishe i-visa ngoba ingisaba
“Kodwa indlela izinto ezihamba ngayo, angiboni ukuthi uzohlala izikhathi eside kuMaZulu.
“Sekunamaqembu amabili afikile ezobuza ngaye. Ngiyazi ukuthi yiPirates neSundowns, kodw anjengamanje angazi yiliphi eliphambili kulo mjaho.
“Nokuthi ubani owafika kuqala ngeke ngisho. Kodwa womabili lamaqembu aseveze izifiso zawo ngalo mdlali.
“Ngizwa sengathi nawo AmaZulu azimisele ukulalela uma kufika abazozibika ngalo mdlali.
“Kodwa sizokwazi kahle ngoJanuwari ukuthi usayinwa manje noma kukhulunyelwa ukuphela kwesizini.”
